如果史友們曾經去過香港墳場參觀，應該都會見過楊衢雲嘅墓碑，而喺楊衢雲死後，其實佢有位好朋友為咗幫佢報仇，而對清朝發動過一場「大明順天國起義」，而呢位好朋友就係謝纘泰。

謝纘泰出生喺1872年，年幼時跟隨家人嚟到香港，就讀當時嘅中央書院，畢業之後就先後做過政府工務局文員、洋行買辦、經理等等。而去到1890年，佢就同革命扯上關係，佢同楊衢雲喺上環百子里成立咗香港首個革命組織輔仁文社、後來楊衢雲獲推舉為香港興中會會長、謝纘泰亦都加入興中會、後來創辦咗英文《南華早報》，喺早期革命有住好重要嘅角色。

1901年楊衢雲被刺身亡，呢個消息對謝纘泰好大打擊，於是佢立志為摯友復仇。謝纘泰搵嚟洪全福重出江湖，領導起義行動。呢位洪全福其實就係洪秀全族姪，年少時亦都喺廣西參與過太平天國武裝行動，戰績彪炳，甚至仲被封為左天將、瑛王。喺戰敗之後就被清兵追緝，逃到嚟香港。

而呢次「大明順天國起義」就係由謝纘泰、李紀堂同埋洪全福三人計劃，由洪全福任大明順天國南粵興漢大將軍，三合會首領梁慕光任總司令，李植生為總參謀，原本計劃係喺1903年1月28日除夕夜，趁廣州群官聚集萬壽宮賀年之時引爆炸藥，占領軍火庫夾攻廣州。但點知喺起義之前嘅三日，就有人向香港警廳告密，部分革命黨人被捕，大明順天國起義計劃慘告失敗。

原圖嚟自網絡